| Prentvæn útgáfa |

Stjörnuskoðun í Kaldárseli

[ Prentvæn útgáfa ]

Kaldársel inn af Hafnarfirði er meðal bestu stjörnuskoðunarstaða í næsta nágrenni höfuðborgarinnar. Þaðan er gott útsýni til suðurs en mikil ljósmengun frá byggðinni spillir norðvesturhimninum. Þangað er nokkurra mínútna akstur frá því komið er inn fyrir bæjarmörk Hafnarfjarðar.

Beygið inn Reykjanesbrautina eins og ætlunin sé að fara út á Keflavíkurflugvöll. Þegar komið er framhjá hringtorgi við bensínstöð ESSO og verslunina 10-11 liggur vegurinn upp brekku. Ofarlega í brekkunni er beygt út af í átt að Kaldárseli (nafnið sést á skilti) og ekið yfir brúna á Reykjanesbrautinni.

Akið varlega á leiðinni inn að Kaldárseli!

• Vegurinn frá Reykjanesbraut fer fyrst framhjá húsum hestamannafélagsins Sörla. Þar eru varasamar hraðahindranir og eins geta hestar fælst.

• Við skógrækt Hafnarfjarðar tekur við hlykkjóttur malarvegur.

• Fylgist með skiltinu sem vísar veginn. Þegar búið er að aka framhjá nokkrum sumarbústöðum er skilti við veginn sem vísar leiðina í Kaldársel.

• Slökkvið á háu ljósunum þegar þið komið upp á hæð þar sem sést í hús sumarbúða KFUK. Ef bjart er af tungli er best að slökkva á bílljósunum sem fyrst. Það kemur verulega á óvart hvað augun eru fljót að aðlagast myrkrinu.

• Sjónaukunum er yfirleitt stillt upp á knattspyrnuvelli hinum megin við hús sumarbúðanna. Hægt er að leggja meðfram veginum og bera dótið yfir 40 cm malarhrygg við völlinn. Slökkvið algerlega á bílljósunum þannig að þau kvikni ekki þótt bíllinn sé settur í gang.

• Gott er ef að hægt er að slökkva á sjálfvirku ljósunum í loftinu sem kvikna þegar bíldyrnar eru opnaðar.

Kortið sýnir hvar beygt er upp á og yfir brúna á Reykjanesbrautinni í Hafnarfirði.